Pse nuk ka punë?

Një nga bisedat më të zakonshme me bizneset në Shqipëri, është për faktin se sa ka rënë puna!

Në dozë të vogël, shqetësimi i rënies së punës është i drejtë, pasi zakonisht meret si referencë dhë justifikim në të njëjtën kohë, rënia e ekonomisë.

Mirëpo, nëse marrim ekonominë në përgjithësi si referencë, edhe unë me njohuritë e mia të limituara në këtë fushë, mund të kuptoj që ka diçka që nuk shkon me ndërlidhjen midis rënies së ekonomisë dhe rënies së punës.

Për të dhënë një shëmbull. nga 2014 në 2015 GDP-ja e Shqipërisë ka rënë nga 13.23 Miliard $ në 11.39 Miliard $ (rënie e ndjeshme), mirëpo deri në 2017 është rritur prapë në 13.04 Miliard $ (Referenca: Google, World Bank).

Pa e ditur në çfarë pike jemi në 2019 (besoj më lartë), mendoj edhe unë si jo-ekonomist, mund të dal në konkluzionin që ndryshimi në ekonomi nuk është aq i madh.

Pra nuk mund të themi kaq kollaj që rënia e punës vjen nga rënia e ekonomisë.

Ndër shumë lloj justifikimesh dëgjoj të tjera si:

• Klima politike është e keqe
• Njerëzit kanë frikë të blejnë si më parë
• Na mbysin taksat
• etj.

Pamvarësisht se në thelb, pikat e mësipërme janë shqetësime me bazë të vërtetë (deri diku), gjithsesi nuk janë aq të forta sa për të justifikuar rënie prej 20,30,50,70% të punës.

Si menaxherë e pronarë biznesesh, në vend që të fajësojmë faktorë jashtë kontrollit tonë, po sikur të fillojmë e ti bëjmë vetes pyetje më produktive, si psh.

• Për çfarë ka nevojë klienti jonë sot, ndryshe nga dje?
• Çfarë mund të përmirësojmë në shërbimin tonë sot?
• Çfarë problemi mund të zgjidhim në treg?
• Si mund të komunikojmë vlerat dhe shërbimet tona më mirë me njerëzit nëpërmjet marketingut efektiv?
• Kush është klienti ynë ideal?

Këto e shumë lloj pyetjesh të tilla si mësipër, na ndihmojnë të kuptojmë realisht çka po ndodh në treg dhe si mund ti shërbejmë më së miri ndryshimeve që vijnë bashkë me kohën.

Realiteti është që biznesi ndryshon, nevojat e njerëzve ndryshojnë me kalimin e kohës, pra me pak fjalë ndryshimi është i sigurtë.

Ndoshta rënia e punës nuk ka të bëjë shumë me rënien e ekonomisë, klimës politike apo faktorëve të tjerë të jashtëm, aq sa ka të bëjë me faktin e thjeshtë që bizneset që nuk ecin përpara, janë në fakt ato biznese që kanë ngecur në vend…

---